Населението во Европската унија до 2100 година ќе се намали за шест отсто, односно за 27,3 милиони луѓе, покажуваат проекциите на Eurostat.
По падот на бројот на населението во 2020 и 2021 година поради влијанијата на пандемијата од Covid-19, популацијата во ЕУ почна да закрепнува во текот на 2022 година.
Како последица на масовниот прилив на бегалци од Украина по руската агресија, се проценува дека населението на ЕУ достигна 451 милион лица на 1 јануари 2023 година. Се очекува врвот да биде достигнат во 2026 година кога се проценува дека во Унијата ќе живеат 453 милиони луѓе, по што ќе почне да стагнира и да се намалува достигнувајќи 420 милиони во 2100 година.
Бројот на деца и млади луѓе (на возраст од 0 до 19 години) во вкупното население се предвидува да се намали од 20 отсто на почетокот на 2022 година на 18 проценти до 2100 година. Уделот на работоспособното население, на возраст од 20 до 64 години, пак, во вкупното население на ЕУ ќе падне од 59 отсто во 2022 на 50 отсто во 2100 година.
Спротивно на тоа, уделот на постарите возрасни групи (65 години или повеќе) ќе се зголеми. Брјот на оние на возраст меѓу 65-79 години се очекува да порасне од 15 на 17 отсто, а на возрасната група од 80 или повеќе да се зголеми повеќе од двојно, од 6 на 15 проценти.
Во 2022 година, пирамидата на населението на ЕУ веќе го покажува обликот поврзан со долг животен век, ниски стапки на смртност и ниски стапки на наталитет. Најголем дел од населението го сочинуваат работоспособни луѓе над 50 години, додека уделот на млади под 20 години е значително помал.
Пирамидата на показатели во 2100 година, пак, јасно покажува развој кон општество што се намалува и старее. Опаѓа уделот на децата и младите под 20 години и на работоспособната популација, а расте на луѓето на возраст од 65 или повеќе години.
