Најмалку пет лица се повредени при уривање на четирикатна станбена зграда во Марсеј, која потоа се запалила.
– Пожарот е исклучително тешко да се контролира. Пожарникарите од минута во минута проценуваат како најдобро да го изгаснат овој пожар бидејќи внатре има потенцијално живи луѓе – рече градоначалникот Беноа Пајан и додаде дека јавноста мора да биде подготвена за тоа што внатре има жртви.
Улиците околу урнатата зграда се полни со прашина. Засега не се знае колку жители имало во зградата.
Зградата се урнала со силна експлозија четириесетина минути по полноќ, по што во урнатините избувнал пожар, што ги отежна спасувачките напори.
– Се обидуваме да ја забрзаме акцијата бидејќи времето е важно, но кучињата не можат да ја издржат оваа температура и топлина – изјави командантот на баталјонот на противпожарната бригада на Марсеј, Лионел Матје.
И покрај тешкотиите, спасувањето продолжува со голем број луѓе. Затворен е целиот сектор околу зградата, како и неколку улици. Во спасувањето учествуваат повеќе од 100 пожарникари, полицајци и припадници на јавната безбедност.
– Постојат силни сомневања дека експлозија предизвикала уривање на зградата, но во оваа фаза мора да бидеме многу внимателни за причините за несреќата – изјави префектот на регионот Буш-де-Рон, Кристоф Мирман, додавајќи дека причина може да биде експлозија на гас.
ALERTE – Plusieurs victimes dans l’effondrement d’un immeuble cette nuit rue de Tivoli, à #Marseille. (@GQuiquerez / @Aurelien1335) pic.twitter.com/Yn86xqacrH
— Infos Françaises (@InfosFrancaises) April 9, 2023
