Десетици илјади луѓе се собраа на нелегален техно фестивал во текот на продолжениот викенд во Франција.
Фестивалот беше отворен во четвртокот, а веќе на 86 посетител им била потребна медицинска помош. Цивилната заштита, Црвениот крст, волонтери и 240 полицајци се распоредени на местото на фестивалот, соопшти во петокот департманот Индре во централна Франција.
Околу 30.000 луѓе веќе дојдоа на фестивалот „Текнивал“ кој се одржува во селото Вилгонгис, а за време на викендот се очекуваат и до 40.000, пренесува радиото France Info. Според други процени, оваа бројка се движи до 60.000 луѓе.
Властите не биле однапред информирани за местото на одржување на „Текнивал“, фестивал популарен ширум Европа. И покрај забраната за спонтани музички фестивали, властите одлучија да не ги растераат учесниците и да се грижат за нивната безбедност.
Организаторите го поставија фестивалот практично преку ноќ, на празен терен. „Нема да ги оттргнеме, ги има премногу“, вели сопственикот на таа нива, додавајќи дека само сака посетителите на забавата да не оставаат зад себе празни канти со пиво и друго ѓубре.
Лекарите и медицинскиот персонал од Универзитетската болница во Рен беа испратени на местото на фестивалот за да бидат во состојба на готовност во случај на итни случаи. Како што изјави шефот на службата за итни случаи на болницата за France Info, повредите што лекарите ги забележале биле главно итни случаи поврзани со алкохол и дрога.
Иако властите дозволија фестивалот да се одржи, неговите организатори се под истрага.