Јапонија ќе обезбеди 10 милиони американски долари за хуманитарна помош за цивилите во Газа, изјави денеска јапонската министерка за надворешни работи Јоко Камикава, а 10 милиони евра помош вети и холандската Влада.
Јапонија во моментов претседава со групата развиени земји Г7 и Камикава рече дека ја следи ситуацијата во Газа „со загриженост“, додавајќи дека Јапонија очекува ситуацијата да се смири што е можно поскоро.
Камикава рече и дека е при крај со подготовките за разговори со нејзиниот ирански колега. Холандската влада во вторникот вети 10 милиони евра за нова хуманитарна помош за Газа, велејќи дека е длабоко загрижена поради брзото влошување на ситуацијата во која се наоѓаат луѓето таму.
Таа додаде дека парите се испраќаат по барање на ОН и дека ќе бидат наменети за основни човечки потреби како што се вода и здравствена заштита. Таа повтори дека Израел има право да се брани по нападите на Хамас, но и дека одговорот треба да биде „пропорционален“ и во рамките на меѓународните правила за војна.
„Цивилите и хуманитарните работници никогаш не треба да бидат цел на насилство и хуманитарната помош треба да има неограничен пристап“, рече холандската министерка за надворешна трговија и развој Лиесје Шрајнемахер во писмо до парламентот.
Шпанија ќе ја зголеми и хуманитарната помош за Појасот Газа со пакет вреден милион евра и е подготвена да испрати уште, рече на прес-конференција шпанскиот министер за надворешни работи Хозе Мануел Албарес.
