Словенечка шахистка по посетата на Албанија и на Србија: Конечно се вратив дома – во цивилизација!

Најдобрата словенечка шахистка Лаура Унук предизвика бурни реакции на социјалните мрежи со нејзината објава дека имала ужасно искуство во Албанија и Србија, каде што се натпреваруваше на турнири.

Шахистката кажа дека конечно се „вратила во цивилизација“, откако претходно поминала девет дена во Албанија и 12 дена во Србија.

„По девет дена во Албанија и 12 во Србија, среќна сум што се вратив во цивилизација во Словенија. Преживеав неколку вируси и 18 тешки натпревари, но врв на сè беа тоалетите на автобуската станица во Белград. Сè уште не знам како да ги користам“, објави Унук.

Унук е повеќекратна шампионка во младинските категории, а меѓу останатото ја претставуваше Словенија и на шаховската Олимпијада во 2013 и 2014 година.