Африканските џиновски полжави, долги и до 20 сантиметри, се сè почести домашни миленици во европските домаќинства, но еден швајцарски универзитет предупредува дека тоа не е добра идеја.
Овие животни би можеле да бидат опасни за луѓето, бидејќи можат да пренесат белодробни глисти кои положуваат јајца во белите дробови на стаорците, што може да резултира со развој на менингитис кај луѓето, објави тим на научници од Универзитетот во Лозана во научното списание Parasites & Vectors.
Додаваат дека приближно две третини од најмалку 36 познати патогени кај полжавите може да ги заразат луѓето. Популарни видови во европските терариуми се африканскиот џиновски полжав (Lissachatina fulica) и азискиот агат полжав (Achatina achatina).
„Социјалните мрежи се полни со фотографии од горди сопственици кои ставаат полжави на кожата или дури и во устата“, вели зоологот Клео Бертелсмајер од Институтот за екологија и еволуција на Факултетот за биологија и медицина во Лозана.
Таа вели дека луѓето веруваат дека слузот од полжав е добар за кожата, но може да биде опасен поради пренесување на патогени.
Бертелсмајер и нејзините колеги, откако анализирале бројни фотографии објавени на социјалните мрежи, откриле дека џиновските полжави се чуваат во домаќинствата како домашни миленици.
Тие предупредуваат дека многу од нив не се свесни за ризикот „на кој се изложуваат себеси и нивните деца кога, на пример, ќе ги стават на лице“, вели коавторот на студијата Жером Жипе.
Истражувачите предупредуваат дека ако се зголеми трговијата со овие домашни миленици, „ќе има повеќе можности за воведување и ширење на штетни патогени на луѓето и другите животни“.
Ахатните полжави се незаситни и брзо се размножуваат. Меѓународната унија за зачувување на природата (IUCN) ги вклучи во листата на опасни инвазивни видови и ги стави во категоријата штетници.
