Палестински официјален претставник изјави за АФП дека одложувањето на спроведувањето на примирјето во Газа се должи на деталите во „последна минута“ за тоа кои заложници ќе бидат ослободени и како.
Примирјето, што се очекуваше да стапи на сила денеска, но беше одложено во текот на ноќта, повторно е вратено поради „имињата на израелските заложници и начините на нивното ослободување“, вели функционерот, кој има познавање на преговарачкиот процес.
Израел побара ослободување на сите деца кои се чуваат во Газа, како и нивните мајки, иако Хамас, наводно, посочи дека не мора да знае каде се наоѓаат сите нив, а некои од нив се држени од други терористички групи во Појасот.
Во ненадејна објава близу до полноќ во средата, врвниот помошник на премиерот Бенјамин Нетанјаху рече дека многу очекуваното ослободување на првата група од 50 израелски киднапирани кои ги држеше Хамас во Газа како дел од договорот за заложници нема да се случи во четврток, туку во петок.
Претседателот на Советот за национална безбедност, Цачи Ханегби, изјави дека преговорите за заложниците „постојано напредуваат“ и „ослободувањето ќе започне според првичниот договор меѓу страните, не пред петок“.
Израелски извор, исто така, вели дека четиридневното затишје во борбите, според договорот, ќе биде во мирување и дека израелските воени операции во Газа ќе продолжат се додека договорот не биде финализиран, објави Хаарец.
Неколку часа подоцна, портпаролот на катарското Министерство за надворешни работи рече дека разговорите за заложниците што Доха ги посредува меѓу Израел и Хамас „напредуваат позитивно“ и дека во наредните часови ќе биде објавено соопштение за точното време кога ќе започне примирјето.
Одложувањето е удар за семејствата кои се очајни да ги видат нивните киднапирани деца, сопружници, ќерки и сестри како се враќаат по речиси 50 дена како заложници на Хамас.
Според Договорот што треба да се реализира, треба да се ослободат 50 живи израелски заложници – деца, нивните мајки и други жени во групи од 12-13 луѓе – за четиридневно затишје во борбите во замена за ослободување на 150 палестински жени и малолетни затвореници. Тоа, исто така, ќе овозможи прилив на гориво и хуманитарни резерви во Газа за време на паузата, првпат откако Хамас иницираше војна пред речиси седум недели, кога неговите терористички членови дивееја низ јужен Израел на 7 октомври и масакрираа околу 1.200 луѓе, повеќето од нив цивили.
Истиот ден, повеќе од 240 беа киднапирани во Појасот Газа од страна на терористичката група и други палестински фракции.
Според договорот, доколку Хамас може да лоцира дополнителни заложници кои се или малолетни или жени неборци за ослободување, договорот може да се продолжи до 10 дена, со еден дополнителен ден пауза во борбите за секои 10 ослободени заложници. За секој ослободен заложник ќе бидат ослободени уште тројца палестински затвореници.
