Израел добил уште еден список на заложници кои Хамас ги држи во Појасот Газа кои ќе бидат ослободени, објавија во средата израелските медиуми.
Се очекува луѓето на списокот да бидат ослободени во средата, објави The Times of Israel, цитирајќи го кабинетот на премиерот Бенјамин Нетанјаху. Останува нејасно колкумина ќе бидат ослободени, но во извештајот се вели дека нивните семејства биле известени.
Ова ќе биде шеста група заложници од Газа што ќе бидат ослободени откако во минатиот петок започна прекинот на огнот меѓу палестинската исламистичка група Хамас и Израел. Досега Хамас ослободи 81 заложник. За возврат, 180 Палестинци беа ослободени од израелските затвори.
За време на незапаметениот напад на 7 октомври, борците на Хамас убија околу 1.200 луѓе во израелските погранични заедници во близина на Газа, а околу 240 беа киднапирани и однесени во крајбрежниот појас Газа.
Израел уште истиот ден одговори со најтешкото бомбардирање на густо населениот Појас Газа досега, а исто така на 27 октомври започна копнена офанзива врз крајбрежната енклава, каде Хамас по изборите ја презеде власта во 2007 година. Од почетокот на војната, според Министерството за здравство на земјата, во Газа се убиени околу 15.000 луѓе, а повеќе од 36.000 се ранети.
