Фудбалерите на Ливерпул ја продолжија големата доминација во англиската Премиер лига, совладувајќи го Вест Хем со 5:0 на гости во 19. коло.
По оваа победа Ливерпул има осум бода повеќе од второпласираниот Нотингем Форест, како и девет повеќе од Арсенал и десет повеќе од Челзи.
Ливерпул поведе во 30. минута со голот на Дијаз, додека домашните можеа да израмнат само осум минути подоцна. Кудус шутираше од околу 20 метри, но израмнувачкиот гол беше спречен од стативата. Веднаш во следниот напад Ливерпул ја зголеми предноста кога Салах му подготви сѐ на Гакпо кој погоди за 2:0.
Бурата на Ливерпул продолжи и потоа, а Салах во 44. минута зголеми на 3:0, додека Александер-Арнолд беше стрелец за 4:0 на почетокот на вториот дел. Резултатски натпреварот беше затворен на крајот, кога уште еднаш сѐ подготви исклучително разиграниот Салах, а конечните 5:0 ги постави Диого Жота.
Во првиот натпревар од неделната програма, фудбалерите на Манчестер Сити беа подобри од Лестер со 2:0.
Манчестер Сити од почетокот на ноември ја извојува само втората првенствена победа, а со овие три бода се искачи на петтото место на табелата. Лестер, тимот предводен од Руд ван Нистелрој, продолжи да губи и се наоѓа во опасната зона на табелата, на 18. место.
Манчестер Сити поведе во 21. минута. По ударот на Фоден, домашниот голман Столарчик ја одби топката на која натрча Савињо и погоди за гостинскиот тим за 1:0. До крајот на првото полувреме двете екипи имаа по неколку шанси, но резултатот не се промени до паузата. Во преостанатиот дел од натпреварот подобар беше Лестер кој напаѓаше во бранови и се закануваше да израмни, но во 74. минута Манчестер Сити ја зголеми предноста. Во убава акција асистираше Савињо, а Халанд погоди со глава за конечни 2:0.
Хрватскиот стратег Иван Јуриќ втор натпревар го водеше Саутемптон и вторпат претрпе пораз, од домаќинот Кристал Палас кој победи со 2:1. Саутемптон имаше добар почеток на натпреварот и поведе со голот на Диблинг во 14. минута. Сепак, до крајот на првиот дел домашните израмнија со голот на Чалоба во 31. минута и поведоа на стартот на вториот дел, во 52. минута кога Езе постигна гол за конечните 2:1. До крајот Саутемптон беше поангажиран на теренот, напаѓаше и бараше барем бод, кој не го освои.
Саутемптон го забележа 15-от сезонски првенствен пораз и сѐ уште е убедливо последен на табелата со само шест бода. Претпоследниот Ипсвич има двојно повеќе.
Одличниот Нотингем Форест го совлада Евертон со 2:0 на гостински терен и барем привремено го зазеде второто место на табелата. Вуд ги доведе гостите во водство во 15. минута, а сѐ беше заклучено со голот на Гибс-Вајт во 61. минута.
Фулам и Бурнемаут ремизираа 2:2 и покрај тоа што Фулам водеше до 89. минута. Потоа Уатара погоди за еден бод на гости. Пред тоа стрелци за домаќините беа Хименез во 40. минута и Вилсон во 72. минута и Еванилсон за гостите во 51. минута.
Со истите 2:2 заврши и натпреварот меѓу Тотенхем и Вулверхемптон, а гостите на крајот се спасија. Странд Ларсен во 87. минута постигна важен поен за Вулверхемптон. Гостите поведоа по голот на Хванг во седмата минута, додека пресвртот дојде на крајот на првото полувреме по головите на Бентанкур во 12. минута и Џонсон во судиското надополнување.
