Црна Гора во вторникот наутро го екстрадираше во САД јужнокорејскиот државјанин, таканаречениот „крал на криптовалутите“ До Квон, кој беше уапсен во Подгорица пред помалку од две години.
До Квон е баран од САД и Јужна Кореја за измама со криптовалути во вредност од најмалку 40 милијарди долари, што се проценува дека е износот на штетата предизвикана на инвеститорите од падот на неговите криптовалути Luna и Terra.
Одлуката за екстрадиција на До Квон во САД ја донесе црногорскиот министер за правда Бојан Божовиќ откако црногорскиот Уставен суд ја одби жалбата на адвокатот на До Квон против пресудата на Врховниот суд.
На крајот од март 2023 година, До Квон беше уапсен на аеродромот во Подгорица со неговиот деловен партнер Чанг Џун, кога се обиделе да летаат за Дубаи со фалсификувани пасоши. Поради ова тие се осудени на по четири месеци затвор.
По отслужувањето на казната, До Квон беше во засолништето за странци во Подгорица и чекаше одлука за екстрадиција, додека Чанг Џун беше екстрадиран во Јужна Кореја на почетокот на февруари оваа година.
Во август годинава Врховниот суд утврди дека се исполнети условите за екстрадиција на До Квон, а одлуката која од двете земји кои го бараат да го екстрадираат му ја препушти на министерот за правда.
Во Америка веќе започна судењето на До Квон во отсуство. Во април оваа година, судот во Њујорк го прогласи за виновен за измама извршена со измама на инвеститори, кои изгубиле околу 40 милијарди долари.
Јужнокорејските власти го обвинија и за измама и кршење на законите за пазарот на капитал.
