На њујоршки Волстрит индексот S&P 500 драстично падна во понеделникот, како и индексот Nasdaq, бидејќи веста за огромната популарност на кинеска апликација во САД го потресе технолошкиот сектор и покрена сомнеж за лидерството на САД во развојот на вештачката интелигенција.
Индексот Dow Jones порасна за 0,65 отсто на 44.713 поени, но S&P 500 потона за 1,46 отсто на 6.012 поени, а индексот Nasdaq падна за 3,07 отсто на 19.341 поени.
Најголемата светска берза ја потресе веста дека апликација од кинескиот стартап DeepSeek се најде на врвот на листата на најдобро оценети бесплатни апликации во App Store на „Apple“, пред американскиот конкурент ChatGPT.
Апликацијата DeepSeek беше лансирана во САД на 1-ви октомври и привлекува корисници со забрзано темпо. Ова го доведе во прашање раширеното верување дека САД се на прво место во светот во развојот на вештачката интелигенција.
Покрај тоа, DeepSeek објави дека користи поевтини чипови и помалку податоци, што предизвика загриженост за тоа колку побарувачката во синџирот на снабдување – од производителите на чипови до центрите за податоци – всушност ќе се зголеми поради развојот на вештачката интелигенција.
Како резултат на тоа, цената на акцијата на „Nvidia“ вчера падна за 17 отсто, што предизвика пад на пазарната вредност на најголемиот светски производител на чипови со вештачка интелигенција за речиси 600 милијарди долари, што е најголем дневен пад на вредноста на една компанија во историјата на Волстрит.
Индексот на секторот за производители на чипови падна за повеќе од 9 отсто, што е негова најголема дневна загуба од 2020 година.
Целиот технолошки сектор се најде под притисок, при што цената на акциите на Мајкрософт падна за повеќе од 2 отсто, а на „Alphabet“ повеќе од 4 отсто. Цената на „Dell Technologies“, производител на сервери за вештачка интелигенција, потона за речиси 9 отсто.
Обемот на тргување беше значително поголем од вообичаеното. На американските берзи вчера се разменија речиси 17,4 милијарди акции, додека дневниот просек во изминатите 20 дена беше 14,9 милијарди.
Ова покажува дека дел од инвеститорите се повлекуваат од пазарот, а некои го префрлаат капиталот од еден во друг сектор. На тоа укажува и податокот дека индексот Dow Jones, кој не содржи многу технолошки акции, порасна и покрај остриот пад на индексот S&P 500.
Цените на акциите вчера паднаа и на повеќето европски берзи. Иако лондонскиот FTSE индекс зајакна за 0,02 отсто, на 8.503 поени, франкфуртски DAX се лизна за 0,53 отсто, на 21.282 поени, а париски CAC за 0,27 отсто, на 7.906 поени.
