Српскиот премиер Милош Вучевиќ во 11 часот ќе одржи прес-конференција во врска со синоќешниот напад врз студенти во Нови Сад, во кој тешко беше повредена една студентка, објави „Блиц“.
Извор на Блиц од српската Влада тврди дека сѐ уште не се знае што ќе каже Вучевиќ во своето обраќање до јавноста, но дека „поради објективна одговорност“ засега не е исклучено ни оставка на Милош Вучевиќ.
– Вучевиќ беше шокиран од настанот во Нови Сад утринава. Поради објективна одговорност, а по синоќешните зборови на претседателот Александар Вучиќ, не ја исклучувам можноста тој да поднесе оставка“, вели за „Блиц“ извор од српската Влада.
Студенти на Филозофскиот факултет во Нови Сад рано утринава соопштија дека синоќа во Нови Сад биле нападнати неколку студенти, а едно девојче е тешко повредено и се наоѓа во Ургентниот центар. Како што се наведува, студентите лепеле плакати со кои ги повикувале граѓаните да протестираат во Нови Сад во сабота, а неколку мажи кои излегле од просториите на СНС ги нападнале со безбол палки.
Со соопштение се огласи и Обвинителството во Нови Сад во кое се вели дека делото е окарактеризирано како насилничко однесување и нанесување тешки телесни повреди, и бара итна акција за потврдување на идентитетот на сторителите.
Нападот врз студентите утрово го осуди и градоначалникот на Нови Сад, Милан Ѓуриќ.
