Шведска сака да испрати затвореници во странство, поради пренатрупаност во нејзините затвори. Се планира испраќање на осуденици на отслужување на казна во затворите во странство. Oдлуката треба прво да биде одобрена од парламентот, објави денеска комисијата назначена од шведската Влада.
Министерот за правда Гунар Штромер на прес-конференција рече дека „има потреба да се работи со нови решенија“ кога станува збор за затворите, наведувајќи дека земјата веќе преговара со други земји за изнајмување простор во нивни затвори.
Шведска во последните две децении беше погодена од ескалација на криминалот на бандите, што ја доведе на врвот на рангирањето за смртоносно насилство и оружје по глава на жител во Европа, а шведската полиција со зголемен број персонал и финансирање, како и со построги закони постигна напредок во борбата против бандите, така што во последните две години имаше помалку смртоносни пукања и повеќе пресуди.