Аргентина најави напуштање на СЗО поради лошото управување со Ковид-19

Аргентина ќе ја напушти Светската здравствена организација (СЗО) поради неадекватното управување со пандемијата на Ковид-19, изјави денеска портпаролот на десничарскиот претседател Хавиер Милеј, пренесe ДПА.

Оваа одлука следи две недели откако претседателот Доналд Трамп ја најави американската одлука да ја напушти СЗО, уште на првиот ден од неговиот втор мандат.

– Претседателот Хавиер Милеј му нареди на министерот за надворешни работи Герардо Вертхајн да ја повлече Аргентина од СЗО, изјави државниот портпарол Мануел Адорни на прес-конференција.

Како и Трамп, портпаролот на Милеј изјави дека аргентинската влада има длабоки несогласувања со СЗО во врска со реакцијата на пандемијата на коронавирусот.

– Ние, Аргентинците, не сакаме да дозволиме ниту една меѓународна организација да се меша во нашата сувереност, а посебно не во нашето здравје, изјави Адорни.

На почетокот на пандемијата во 2020 година, Јужна Америка, како и Аргентина, воведе многу строги мерки за сузбивање на ширењето на коронавирусот.

Полицискиот час беше во сила подолго отколку во речиси која било друга земја на светот и, во некои случаи, луѓето можеа да излегуваат од своите домови само за неопходни набавки и лекарски прегледи.

Милеј стана претседател во декември 2023 година.