Мултимилијардерот Илон Маск, сојузник на американскиот претседател Доналд Трамп, изјави дека не е заинтересиран да ја купи TikTok, апликацијата за размена на куси видео содржини која САД се обидуваат да ја забранат поради наводна безбедносна закана од нејзините кинески сопственици.
Изјавата на Маск од крајот од јануари беше објавена во саботата на веб-страницата на WELT Group, дел од германската медиумска корпорација „Axel Springer SE“, која беше домаќин на настанот, на кој гостин преку видео врска беше сопственикот на технолошките корпорации „Tesla“, „SpaceX“ и социјалната мрежа X.
„Не дадов понуда за TikTok“, рече милијардерот една седмица откако Трамп предложи дека е отворен Маск да ја преземе апликацијата, во сопственост на кинеската „ByteDance“.
„Немам планови што ќе правам со TikTok“, рече Маск, додавајќи дека тој лично не ја користи апликацијата и не е запознаен со нејзиниот формат.
„Воопшто не сум желен да го преземам TikTok, обично не преземам компании, тоа е многу ретко“, продолжи Маск, нарекувајќи го невообичаено своето преземање на поранешниот „Twitter“, сега Х.
„Генерално, градам компании од темел“, додаде тој.
Трамп потпиша извршен указ со која се бара одложување на забраната на популарната апликација која требаше да биде блокирана во САД на 19-ти јануари.
На „ByteDance“ му беше даден рок во јануари да ги продаде американските средства на TikTok или ќе се соочи со забрана. Американските законодавци се загрижени дека апликацијата претставува закана за националната безбедност бидејќи кинеските власти би можеле да ја принудат да споделува податоци за американските граѓани. Речиси 170 милиони луѓе во САД, односно половината од населението го користат TikTok.
