Како контакт точка на Системот за брзо известување за небезбедна храна и храна за животни на Европската унија ( RASSF), до овој момент, Агенцијата за храна и ветеринарство (АХВ) нема добиено известување дека на македонскиот пазар е пласиран небезбеден сок по потекло од Република Србија, се наведува во одговорот на Агенцијата на НетПрес
Се додава дека АХВ редовно ја следи ситуацијата, како и дека доколку се јави потреба навремено ќе бидат преземени соодветните мерки и јавноста информирана.
Претходно во четвртокот хрватските медиуми објавија дека тамошните санитарни инспектори наредиле итно уништување на пратка со сок од јаболко од Србија поради присуство на микотоксини. Како што се наведува, Европскиот систем за безбедност на храна (RASSF) објавил дека микотоксинот патулин, произведен од одредени видови мувла, е откриен во сок од јаболко од Србија.
Патулин е откриен во примерокот на сокот во концентрација од 93 микрограми на килограм јаболка, а европските прописи не дозволуваат присуство на овој микотоксин воопшто. Според упатствата на ЕУ, максималниот толерантен дневен внес на патулин во организмот е 0,4 микрограми по килограм храна.
Патулин најчесто се наоѓа во соковите добиени со пресување свежи јаболка. Бројни научни студии ја потврдија токсичноста на патулинот за организмот. Симптомите на акутно труење вклучуваат вознемиреност, грчеви, отежнато дишење и пулмонална конгестија. Исто така, може да предизвикаат дигестивни проблеми со улцерации, надуеност и крварење, а при високи дози, промени во функцијата на бубрезите.
