Египет развива план за обнова на Појасот Газа без раселување на неговите жители во други земји.
Овој предлог има за цел да одговори на планот на американскиот претседател Доналд Трамп, кој предвидува неодредено преместување на жителите на Газа во странство и преземање на територијата од страна на САД. Според Асошиејтед прес, кој цитира двајца египетски функционери, планот на Каиро вклучува привремено раселување на жителите во „безбедни зони“ во самата Газа, додека египетските и меѓународните компании ја преземаат реконструкцијата на територијата.
Проектот вклучува формирање на палестинска администрација која нема да биде поврзана ниту со Хамас, ниту со палестинската самоуправа. Оваа нова структура ќе биде одговорна за управување со Газа и надгледување на напорите за реконструкција. Таа ќе има полициски сили главно составени од поранешни полицајци на палестинската самоуправа кои останаа на своето место откако Хамас ја презеде власта во 2007 година, со поддршка на силите обучени од Египет и западните земји.
Според извештајот, египетскиот план се заснова на трифазна реконструкција во текот на пет години, без да се бара трансфер на населението надвор од Газа.
Се очекува да бидат мобилизирани повеќе од дваесет египетски и меѓународни компании за расчистување на урнатините и обновување на инфраструктурата. Надлежните уверуваат дека оваа програма ќе отвори десетици илјади работни места за локалното население.
Проектот има за цел да се спротивстави на американскиот предлог кој, и покрај поддршката на неколку официјални лица во САД и Израел, беше отфрлен од земјите кои најверојатно ќе бидат домаќини на раселените жители на Газа. Ал-Ахрам прецизира дека египетскиот предлог има за цел да ја „побие логиката на американскиот претседател Трамп“ и да се спротивстави на „секој обид за промена на географската и демографската структура на Појасот Газа“.
