На Волстрит берзанските индекси благо пораснаа во средата, при што S&P 500 достигна ново рекордно ниво, а тргувањето беше претпазливо поради најавата на американскиот претседател Доналд Трамп за нови царини.
Индексот Dow Jones порасна за 0,16 отсто, на 44.627 поени, додека S&P 500 порасна за 0,24 отсто, на 6.144 поени, а индексот Nasdaq за 0,07 отсто, на 20.056 поени.
Инвеститорите беа фокусирани на записникот од последниот состанок на челниците американската централна банка, кога ги оставија каматните стапки непроменети поради високата инфлација. Записникот не донесе никакви изненадувања, покажувајќи дека лидерите на Fed се загрижени за зголемената инфлација и можното влијание на политиките на Трамп, особено царините, врз нивните напори да ја спуштат инфлацијата на целните нивоа. А тоа значи дека Fed најверојатно нема да продолжи да ги намалува каматните стапки во скоро време.
Внимателни се и инвеститорите поради најавата за нови царини. Вчера Трамп најави дека планира да воведе царини од 25 отсто за автомобили, но овие царини нема да ги воведе пред 2 април, кога ќе ги има сите податоци колку земји во светот наплаќаат царини за увоз на американски производи. Трамп, исто така, рече дека ќе ги зголеми царините за фармацевтските производи и полупроводниците на 25 проценти и дека тие би можеле дополнително да се зголемат до крајот на годината. Поради тоа, инвеститорите се плашат од трговска војна.
Сепак, пазарот е поддржан од добри деловни резултати на компаниите. Досега, повеќе од 400 компании од индексот S&P 500 објавија извештаи за нивниот бизнис во последниот квартал од минатата година, при што 74 отсто од нив оствариле поголема заработка од очекуваната. Аналитичарите сега проценуваат дека профитот на компанијата во изминатиот квартал пораснал за повеќе од 15 отсто на годишно ниво, додека на почетокот на годината очекуваа раст од околу 10 отсто.
А на европските берзи цените на акциите значително паднаа. Лондонскиот FTSE индекс се намали за 0,62 отсто, на 8.712 поени, додека франкфуртски DAX се лизна за 1,80 отсто, на 22.433 поени, а париски CAC за 1,17 отсто, на 8.110 поени.
