На европските берзи се тргува претпазливо во понеделник претпладнето, при што берзанските индекси стагнираат додека инвеститорите чекаат нови вести кои би можеле да го насочат пазарот.
Индексот STOXX 600 на водечките европски акции во претпладевниот пресек од тргувањето порасна за 0,1 отсто, по минатонеделниот пад. Лондонскиот FTSE индекс ослабе за 0,13 отсто, на 8.668 поени, додека франкфуртски DAX зајакна за 0,11 отсто, на 23.035 поени, а париски CAC за 0,10 отсто, на 8.130 поени.
И на повеќето азиски берзи цените на акциите благо пораснаа, но индексот на азиските акции MSCI беше речиси непроменет во 9:30 часот во споредба со петокот. Јапонскиот индекс Nikkei порасна за 0,4 отсто, додека цените на акциите во Австралија и Јужна Кореја пораснаа околу 0,2 отсто. Во Шангај и Хонгконг, пак, паднаа меѓу 0,2 и 1,8 отсто.
Откако минатата седмица силно пораснаа, благодарение на најавата за нови стимулативни мерки, кинеските берзи претпладнево значително паднаа, бидејќи инвеститорите беа потресени од новите знаци на забавување на економскиот раст.
За време на викендот беше објавено дека потрошувачките цени во Кина паднале за 0,7 отсто во февруари во споредба со истиот месец минатата година, што е нивен прв пад во последните 13 месеци. Тоа е последица на слабата потрошувачка, а инвеститорите стравуваат дека овој негативен тренд ќе продолжи и ќе доведе до дефлација.
Пазарите, исто така, се негативно погодени од неизвесноста поради нејасната трговска политика на американскиот претседател Доналд Трамп.
На почетокот од минатата седмица Трамп воведе царини од 25 отсто за увоз од Канада и Мексико, а ги зголеми царините за увоз на кинески производи за дополнителни 10 отсто, на вкупно 20 отсто. Канада и Кина веднаш возвратија со иста мера. Трамп потоа одлучи да ги одложи царините за автомобилите увезени од Канада и Мексико за еден месец, а потоа ги одложи царините за сите стоки опфатени со Северноамериканскиот договор за слободна трговија за еден месец.
Ваквите ненадејни промени ги вознемирија пазарите бидејќи војната со царините може да го забави глобалниот економски раст.
