Новиот канадски премиер Марк Карни во неделата објави одржување предвремени избори за 28-ми април, велејќи дека му е потребен силен мандат за да се соочи со заканата којашто за економијата ја претставуваат царините на американскиот претседател Доналд Трамп.
Иако редовните избори не требаше да се одржат до 20-ти октомври годинава, Карни се обидува да профитира од ненајденото исклучително закрепнување на Либералната партија во анкетите од јануари по големото заостанување зад опозицијата, кога Трамп ѝ се закани на Канада а поранешниот премиер Џастин Трудо ја објави својата оставка. Според анкетите, либералите на Карни, кои се на власт од 2015 година и кои на почетокот од годината беа зад опозициската Конзервативна партија, сега се пред своите конкуренти.
„Се соочуваме со најголемата криза во нашиот живот поради нефер трговските потези на претседателот Трамп и неговите закани за нашиот суверенитет“, рече Карни.
„Треба многу да се направи за да се обезбеди Канада. Инвестирајте во Канада, изградете ја Канада, обединете ја Канада. Затоа барам цврст позитивен мандат од моите сограѓани Канаѓани. Само што побарав од генералната гувернерка да го распушти парламентот и да распише избори за 28-ми април, а таа се согласи“, им рече Карни на новинарите откако генералната гувернерка, личната претставничка на британскиот крал Чарлс Трети, всушност шеф на канадската држава, го одобри неговото барање за избори.
Карни пред две седмици го презеде водството на Либералната партија и на тој начин стана премиер на Канада.
Во неделата тој рече и дека американскиот претседател се обидува да ја „скрши“ Канада за да ја „запоседне“, ветувајќи дека ќе се спротивстави на тоа. Доналд Трамп „сака да нѐ скрши за Америка да нè поседува… Но нема да дозволиме тоа да се случи“, вети шефот на канадската влада.
