Министерството за животна средина објави дека по извршен вонреден инспекциски надзор го казни Булмак 2016 ДООЕЛ Пробиштип со 200.000 евра по пукнатата цевка од рудникот за олово и цинк Тораница во Крива Паланка, по што се излеаа тешки метали во Крива Река.
Државниот инспекторат за животна средина извршил вонреден инспекциски надзор на 24.03.2025 година и утврдил дека „Булмак 2016“ ДООЕЛ Пробиштип подружница Рудник Тораница, Крива Паланка, согласно член 212-ж став (1) точка 16 и став (2) од Законот за животна средина, сторила прекршок од трета категорија. Сторителот се согласил да се поведе постапка за спогодување согласно Законот за животна средина пред Комисијата за спогодување при Министерството за животна средина и просторно планирање.
Имено, според известување од страна на БУЛМАК, на 14.03.2025г., во период од 06:30 до 07:00 часот се случи инцидент поради пукање на цевка преку која се доведува технолошката вода од таложникот за јамски води до погонот флотација, која не содржи хемиски средства бидејќи е истечена пред да дојде во погонот на флотација и содржи само механички онечистувања, односно е заматена.
Булмак извести дека во меѓу време дефектот се санира и е сопрено истекувањето на водата.