Претседателката и врховен командант на Армијата, Гордана Сиљановска Давкова, истакна дека нашиот влог во НАТО претставува и влог во Армијата, како клучен елемент за зачувување на територијалниот интегритет и независноста на Република Македонија. Сиљановска Давкова го изрази своето задоволство по повод 5-годишнината од пристапувањето на Македонија во НАТО, која беше одбележана во касарната „Илинден“ во Скопје.
Претседателката нагласи дека како држава мораме да продолжиме да инвестираме во одбраната и безбедноста, како и да бидеме активен учесник во мировните мисии водени од НАТО и Обединетите нации. Таа исто така најави дека Македонија ќе продолжи да се усогласува со НАТО-стандардите и Заедничката безбедносна и одбранбена политика на Европската Унија.
Сиљановска Давкова нагласи дека, иако процесот на интеграција во НАТО беше исполнет со многу предизвици и жртви, особено од страна на воените и цивилните припадници на Армијата, Македонија успеа да ги оствари своите стратешки цели. Таа изрази гордост за напорите и достигнувањата на македонските војници, кои со својот труд и посветеност стекнаа висока почит од сојузниците во НАТО.
Таа исто така нагласи дека со денешните безбедносни закани, особено со глобалните ризици, нестабилноста и новите хибридни и сајбер-закани, неопходно е да продолжиме со вложување во напредни технологии и оружја, како и да ја зајакнуваме одбраната во македонскиот контекст и во рамките на НАТО.
Претседателката потсети дека петтата годишнина од членството во НАТО не е само потсетник на патот што го поминавме, туку и на основната идеја на Алијансата – мир и безбедност за сите земји членки. Во таа насока, Сиљановска Давкова истакна дека Македонија ќе продолжи да се движи во правец на стабилност и безбедност, како дел од евроатлантската заедница.
На свеченоста присуствуваа и други значајни фигури, како министерот за одбрана Владо Мисјаловски, кој потврди дека членството во НАТО ја зацврстува безбедноста на Македонија и дека тој процес продолжува со нови инвестиции во одбраната и модернизацијата на Армијата.
