Неодамнешниот напад врз станицата за мерење на гас во Суџа во руската област Курск е изведен и координиран по наредба на Велика Британија, изјави во објава на мрежните страници на руското Министерство за надворешни работи, портпаролката Марија Захарова.
Минатиот петок украинската војска ја нападна затворената гасна постројка и мерна станица за гас во Суџа во западниот руски регион Курск преку која рускиот гас преку украинската мрежа се испорачуваше во Европа, а според извори блиски до руските безбедносни служби, оштетени беа и цевководи. Украинската војска тогаш на својот Telegram канал објави слика од „огнена топка“ која се издигнува кон небото со натпис: „Медиумите известуваат за успешен удар врз системот за транспорт на гас Суџа преку кој непријателот испорачуваше гас во Европа“.
Овој напад се случи непосредно откако Вашингтон објави дека американските високи функционери договорија со руските и украинските претставници запирање на ударите врз енергетските инфраструктури на двете земји.
„Постојат основи да се верува дека насочувањето и целењето (на ударот врз Суџа) биле извршени преку француски сателитски систем, а внесувањето на координатите и лансирањето биле изведени од британските стручњаци. Командата била издадена од Лондон“, се вели во коментарот на Захарова објавен денеска во кој не се даваат дополнителни објаснувања и податоци.
Додава дека станицата и претходно била напаѓана од страна на украинските војски кои ненадејно продреа во пограничната руска област Курс минатиот август, а дека по минатонеделниот ракетен напад таа речиси е уништена. Покрај тоа, Захарова потсетува и дека украинските беспилотни летала истиот ден ја нападнале нафтената рафинерија во другиот руски регион на јужната граница Саратов.
„Тоа се далеку од тоа да се првите чинови на терор на украинската војска против енергетската инфраструктура на Русија, откако беше објавена забраната за напади на таквите објекти од 18-ти март. Беа изведени напади против претпријатија од гасната индустријата, трафостаници за дистрибуција на електрична енергија, капацитети за складирање нафта, вклучително и оние кои се сопственост на меѓународниот „Касписки цевководен Конзорциум“ (CPC) (во кој удел имаат и американски компании – з.р.) во (руските) региони Брјанкс, Курск, Белгород, Краснодар и Крим. Теророт што го сее режимот во Киев против рускиот енергетски систем е дополнителен доказ за неговата неодговорност и неспособност да преговара“ за прекин на огнот, додава Захарова.
Потсетува дека украинскиот претседател Володомир Зеленски непосредно пред ударот во Суџа јавно ги поддржал меѓусебните забрани за напади врз енергетската инфраструктура.
„Како што е познато, Володимир Зеленски јавно го поддржа мораториумот на непаѓање врз енергетските капацитети во Русија и Украина, предложен од претседателите на Русија и САД, но не направи ништо за да се придржува до него. Она што се случи потврдува дека Киев нема политичка волја за мир. Тие сѐ уште размислуваат во смисла на војна, решени се да го ескалираат конфликтот и се подготвени на секакви обиди за да се спротистават на напорите за остварување на конечното запирање на украинската криза“, заклучува Захарова.
