Додека народот и државата тагуваат поради огромната трагедија во Кочани во која згаснаа 59 млади животи, а околу 200 се повредени, Владата на ВМРО ДПМНЕ турка тендери за мерење рејтинзи и пропаганда, рече во саботата портпаролката на опозициската СДСМ, Богданка Кузеска.
„За поддршката на семејствата и граѓаните во Кочани се организираат донации а владата на ДПМНЕ троши 400.000 евра за анкети и мерење на рејтингот на Мицкоски. Тоа не било доволно па гледаме објава на нов тендер за уште еден скап проект – оцена на медиумското влијание, мониторинг на медиумите, на социјалните мрежи, прес клипинг и оценка на вестите. Владата набавува софтвер за да ги оценува вестите на медиумите– дали се позитивни, негативни или неутрални, а планира да собира податоци и за авторите“, рече Кузеска.
Праша дали тоа се приоритетит на власта?
„Нема пари за плати, нема за пожарникарите, за лекарите, за работниците, пари има само за папаја, манго и рејтингот на Мицкоски. Зошто да се трошат пари на граѓаните за прес-клипинг кога веќе има професионална служба за прес-клипинг во Владата? Граѓаните добро ги знаат режимските методи на ДПМНЕ и ова е само нивно продолжение“, тврдеше во продолжение Кузеска.
Портпролката на СДСМ постави од говорницата прашање и „како тоа Владата на ДПМНЕ планира да ги селектира медиумите како позитивни, негативни или неутрални, што ќе случи доколк у известуваат негативно, ќе бидат казнети, замолчувани?“ и констатираше дека „власта манифестира бесчувствителност и расипништво во време кога граѓаните едвај врзуваат крај со крај и се во колективна тага“.
СДСМ бара итно поништување на тендерот за „софтвер за медиумско влијание” и тендерот за анкети. Тие пари, заедно со 400.000 евра предвидени за анкети да се дадат за помош на семејствата и граѓаните на Кочани. Сега е време за солидарност и одговорност, а не за мерење рејтинзи и пропаганда, заклучи Кузеска.