Американскиот претседател Доналд Трамп побара од своите советници да заземат построг став за царините додека администрацијата се подготвува за голем пресврт во глобалната трговска војна, објави весникот The Washington Post во саботата, повикувајќи се на четири упатени извори.
И покрај повиците на сојузниците од Волстрит и од Капитол Хил на оваа проблематика да ѝ се пристапи на поинаков начин, Трамп инсистира на сеопфатни трговски мерки со кои сака да ја преобликува американската економија, според The Washington Post, пренсува агенцијата Reuters.
Според истиот извор, Трамп наводно постојано им нагласувал на своите советници дека сака да продолжи да ги заострува трговските мерки, а неодамна ја оживеал идејата за универзална царина која би важела за повеќето увозни производи, без оглед на земјата на потекло.
Според написот во The Washington Post, Трамп изразил жалење што не вовел пообемни царини за време на неговиот прв мандат и ги обвинил своите тогашни советници дека го убедиле да се откаже од планот. Сепак, не е сосема јасно колку сериозно се разгледува идејата за универзална царина, се додава.
Претседателот Трамп е убеден дека царините се полезни за Соединетите држави со враќање на работните места во производството и зголемување на владините приходи за милијарди долари, пишува The Washington Post.
Во петокот, Трамп рече дека е подготвен да склучува договори со земјите кои сакаат да ги избегнат американските царини, но дека таквите договори ќе бидат можни само откако неговата администрација на 2-ри апртил ќе ги објави реципрочните мерки.
