Ракометарите на Алкалоид во неделата го остварија најголемиот успех во кусото постоење на клубот со пласман во своето прво европско полуфинале.
Во салата „Автокоманда“ во Скопје, домаќините забележаа победа против Баја Маре од Романија со 32:25 во реваншот од четвртфиналето во ЕХФ Европскиот Куп. По нерешените 31:31 во Романија, со вкупни 63:56 избраниците на тренерот Кире Лазаров се пласираа во полуфиналето на третото по квалитет европско клупско натпреварување.
Овој историски успех добива поголема вредност ако се знае дека на двете средби Алкалоид играше без повредениот Марко Митев, еден од најдобрите во тимот.
На досегашните осум натпревари сезонава во ЕХФ Европскиот Куп, македонскиот претставник има седум победи и едно реми.
„Среќен сум и задоволен, можеби се уште не ја чувствувам таа среќа, немаме ни време да се израдуваме за два дена ни започнува плеј-офот во првенството. Но, тоа е така во професионалниот спорт на највисоко ниво. Мислам дека ова е голем успех за самиот клуб, ракометарите и за македонскиот ракомет затоа што еден клуб составен од 95 отсто македонски ракометари и најмногу млади ќе игра полуфинале во едно европско натпреварување. Навистина тоа ме прави горд, се надевам и луѓето во клубот“,рече Лазаров.
На момците им честиташе за пожртвуваноста, борбата, играта и пласманот во полуфиналето.
„Во дадени моменти се чувствува дека ни фалат рутина и искуство да бидеме подобри. Како и да е ова огромен успех. Во полуфиналето против Рунар со оние информации што ги имам досега, не сум ги гледал, очекувам атомски ракомет. Се надевам во иднина ќе прикажуваме и подобри изданија, иако свесен сум дека нема да биде лесно затоа што во составот го немаме и нашиот можеби најдобар ракомет Марко Митев“, рече Лазаров.
