Буџетскиот дефицит и јавниот долг на Соединетите држави ќе бидат значително над долгорочниот просек оваа година и ќе продолжат да растат до средината на векот, со висок товар од каматите и зголемена државна потрошувачка на здравствената нега поради стареењето на населението и послабиот економски раст, прогнозира Институтот CBO.
Во фискалната 2025 година, која завршува на 30 септември, буџетскиот дефицит ќе изнесува 6,2 отсто од бруто домашниот производ (БДП), пресмета СВО, и ќе биде за 0,2 процентни поени понизок од фискалната 2024 година.
Тоа значи дека ќе биде значително повисок од долгорочниот просек за периодот од 1995 до 2024 година, кој изнесува 3,9 отсто од БДП.
Ќе се задржи над шест проценти во 2035 година а ќе надмине седум проценти до 2055 година, според најновите долгорочни буџетски проекции на институтот, кој ги ангажира поранешните функционери од Министерството за финансии и централната банка, како и поранешни членови на Конгресот.
Кога ќе се исклучат каматните трошоци, кусокот оваа година се очекува да биде 3,0 отсто од БДП, за 0,3 процентни поени понизок од фискалната 2024 година. До 2055 година ќе се спушти на 1,9 отсто.
Јавниот долг годинава повторно ќе биде еднаков на вредноста на БДП и ќе биде значително над просекот во изминатите 30 години, кој изнесува 60 отсто од БДП. Во фискалната 2029 година, ќе го надмине БДП-то за седум проценти и ќе достигне ново високо ниво мерено со уделот во БДП од крајот на Втората светска војна. Во 2035 година треба да го надмине за 18 отсто, а во 2055 година за дури 56 отсто.
Проекциите се засноваат на законите кои беа на сила до крајот на јануари годинава, забележува институтот. Тогаш Доналд Трамп влезе во Белата куќа и брзо усвои низа прописи, најавувајќи дека има намера значително да ги намали владините трошоци, но и да ги продолжи даночните олеснувања кои треба да истечат на крајот на оваа година.
Каматно оптоварување
Големо оптоварување на државните финансии ќе бидат нето каматите коишто во тековната фискална година ќе достигнат 3,2 отсто од БДП, а до 2055 година ќе се зголемат на дури 5,4 отсто од БДП.
Стареењето на населението носи и повисоки трошоци за здравствена заштита, така што трошењето за главните програми за здравствена заштита ќе се зголеми од 5,8 отсто од БДП во фискалната 2025 година на 8,1 отсто од БДП во 2055 година, кога заедно со програмите за социјална заштита тие ќе претставуваат половина од примарните владини трошоци, пресметале во СВО.
Населението во следните 30 години, пак, ќе расте побавно отколку во изминатите три децении, што, како што велат, ќе ја забави економската активност со оглед на намалената работна сила.
Реалниот БДП се очекува да порасне за 2,1 отсто во фискалната 2025 година, малку под долгорочниот просек. До 2055 година би требало да забави на 1,4 отсто.
„Нараснувањето на долгот би го забавило економскиот раст, би го зголемило отпалќањето на каматите на странските иматели на американскиот долг и би создало значителни ризици за фискалната и економската перспектива“, предупредува институтот.
Се очекува дека каматните стапки на 10-годишните државни обврзници ќе се намалат малку оваа фискална година, на 4,1 отсто. Во 2055 година тие треба да бидат само малку пониски, на 3,8 отсто, поради зголеменото задолжување на државата и побавниот раст на работната сила, пресметаа тие.
