Соединетите држави нема да го преземат Гренланд, објави во неделата вечерта премиерот Јенс-Фредерик Нилсен во објава на Faceboоk како одговор на изјавите на американскиот претседател Доналд Трамп дека сака да ја преземе контролата врз големиот полуавтономен остров на Арктикот.
„Претседателот Трамп рече дека САД ќе го заземат Гренланд. Сакам да бидам јасен: САД нема да го добијат. Ние никому не припаѓаме. Ние самите ја одредуваме нашата иднина… Така беше денеска. Така беше вчера. И така ќе биде и во иднина“, рече Нилсен.
Додаде дека Гренланѓаните не треба да се плашат од изјавите на Трамп, туку треба „да одговорат на нив смирено, достоинствено и сплотено“.
Трамп претходно во неделата во телефонското интервју за телевизиската мрежа NBC News рече дека имал „целосно“ реални разговори за анексија на полуавтономната данска територија. „Ќе го земеме Гренланд. Сто проценти“, рече Трамп.
Американскиот претседател уште во првиот свој мандат повеќепати изјавувапе дека Гренланд треба да стане дел од САД, поворувајќи ги интенциите на некои неговите претходници во Белата куќа кои датираат уште XIX век. Во 1867 година, кога претседателот Ендрју Џонсон ја купи Алјаска, тој исто така размислувал да го купи Гренланд. На крајот на Втората светска војна, администрацијата на претседателот Хари Труман ѝ понуди на Данска 100 милиони долари за островот. Но и двајцата во нивното време не успеаја да ја остварат зделката. Американските амбции кон најголемиот остров во светот богат со ресурси Трамп ги повтори и во текот на неговиот прв претседателски мандат во 2019 година.
Трамп истакнува дека овие арктички територии се стратешки важни за националната безбедност на САД и заштитата на „слободниот свет“, од операциите на Кина и Русија во регионот. Американците имаат воени бази на островот уште од Втората светска војна. На половина пат меѓу Москва и Њујорк, сегашната база Питуфик е најсеверната станица на американските вооружени сили и е опремена со систем за рано предупредување за ракетен напад врз Северна Америка.
Трамп, исто така, не почетокот од годинава не ја исклучи и употрбата на политичка па и воена присила сила за да воспостави контрола над островот.
Гренланд до 1953 година беше колонија на Данска, но сè уште останува дел од кралството. Во 2009 година доби автономија со можност за самоуправување и самостоен избор во внатрешната политика.
За време на посетата на американската воена база во северниот дел на Гренланд во петокот, американскиот потпретседател ЏејДи Венс ја обвини Данска дека не сторила ништо добро за подобрување на локалното население и за осигурување на безбедноста на островот и сугерираше дека Соединетите држави ќе направат подобра работа за заштита на стратешки лоцираниот остров.
