ВМРО-ДПМНЕ го осудува говорот на омраза и непочитувањето изразено на фудбалскиот натпревар во Тетово. Тоа не само што не е етички, туку и го нарушува единството и солидарноста која е повеќе од потребна во овие моменти.
„Не сакаме да веруваме дека ова е дел од едно сценарио за нарушување на меѓусебните етнички односи, но очигледно националистичките и шовинистички скандирања се последното прибежиште на оние кои во политиката гледаат можност на криминал и богатење.
Ова не треба да се претстави како тензија помеѓу Македонците и Албанците, бидејќи изразуваме огромна почит кон Албанците за своите гестови на сочувство и почит кон своите сограѓани Македонци поради неодамнешната трагедија во Кочани.
Од тие гестови треба да се земе пример за заедништво, соживот и меѓусебна почит и да биде светлина во моменти на трагедија и предизвици, но и кога вакви провокации како оваа денес од страна на мала контролирана група ќе се обидат да го нарушат спокојот на сите наши граѓани.
Благодарност до сите етнички заедници за својот придонес и поддршка на своите сограѓани Македонци во овие тешки времиња на тага и предизвици. Со демонстрирањето на заедништво и меѓусебна почит, Македонија, докажува дека е посилна од сите оние кои сакаат да ја однесат во лош правец.
Бараме реакција од сите општествени чинители кои мораат да влеат доверба и меѓусебна почит“.
Македонската фудбалска јавност е згрозена од непочитувањето на едноминутното молчење како спомен за жртвите во трагедијата во Кочани, на натпреварот Шкендија – Брера во Тетово. И додека фудбалерите, стручните штабови и судиите го испочитуваа молкот за жртвите, тоа не беше случај со „Балистите“, кои навиваа и свиреа за време на молкот, објави Гол.
Оваа постапка делегатот Гоце Шопоски од Струга ја внесе во записникот, а по прегледување на ТВ-снимката организаторот ризикува жестока казна.
Според дисциплински правилник, Шкендија може да буде казнета од 4 до 12 натпревари без присуство на гледачи или со суспензија на теренот и со играње надвор од Тетово и парична казна од 5.000 евра. Се очекува реакција од Шкендија, во која клубот ќе се огради од навивачите и од нивното однесување, а веројатно дисциплинската комисија ќе реагира до крајот на неделата.
