Откако мадридски Реал во вторникот во извонреден натпревар избори учество во финалето на шпанскиот Куп на кралот, ден подоцна истото го стори и најголемиот ривал Барселона која со вкупни 5:4 во полуфиналниот двомеч го совлада мадридски Атлетико.
Во првиот натпревар на домашен терен Каталонците не успеаја да остварат предност откако Атлетико сигурниот пораз го претвори на крајот во реми 4:4, додека во реваншот Барса во многу потврдриот натпревар во Мадрид славеше минимално со 1:0. Единствениот погодок на мечот го постигна Феран Торес во 27 минута по одличната асистенција на Ламин Јамал кој во првиот дел беше незадржлив за одбраната на Атлетико.
Во вториот дел Атлетико се ослободи од доминацијата на гостите и притисна барајќи барем погодок за изборување на продолженија. Домашните и успеаја да погодат во 69 минута, но стрелецот Серлот беше во минимален офсајд поради што погодокот беше поништен.
Барса играше во продолжението со згусната одбрана, но сепак во противнападите создаде а не реализираше неколку шанси кои можеа предвреме да го решат дуелот.
Барселона, која е рекордер според титулите во националниот шпански куп, ги има 31, ќе добие прилика за уште еден и тоа против најголемиот спортски ривал, Реал Мадрид кој има 20 вакви титули. Атлетик Билбао е втор на оваа листа со 24 победи. Атлетико Мадрид, останува на 10 славења во Купот на кралот.
Финалниот натпревар е закажан за 26 април во Севиља.
