Заканите и притисокот не се начин за справување со Кина, предупреди во понеделникот портпаролот на кинеското Министерство за надворешни работи, опишувајќи ги царините наметнати од САД како злоставување.
Царините се „типичен унилатерализам и протекционизам, економско злоставување“, рече Лин Џијан за време на редовната прес-конференција. Додаде дека американските царини во име на реципроцитет всушност им служат на САД само на сметка на другите земји.
Минатата седмица американскиот претседател Доналд Трамп објави нови царини од 34 отсто на кинескиот увоз, како дел од мерките што ги воведе на повеќето американски трговски партнери. Ова го зголеми вкупното ниво на царини за кинески стоки на 54 отсто, а Пекинг одговори со контрамерки.
Лин го пренасочи прашањето за потенцијалните преговори со САД на други кинески владини тела.
„Американската злоупотреба на царините ги лишува земјите, особено оние од глобалниот Југ, од нивното право на развој“, рече Лин, наведувајќи ја растечката нееднаквост меѓу богатите и сиромашните во секоја земја и особеното влијание на царините врз посиромашните земји.
Сите земји треба да се држат до консултации, заедничко одлучување и „вистински мултилатерализам“, рече портпаролот на кинеската дипломатија.
Ги повика земјите заеднички да се спротивстават на сите форми на унилатерализам и протекционизам и да го заштитат меѓународниот систем и мултилатералната трговија засновани на вредностите на Обединетите нации и Светската здравствена организација.
