Цената на биткоинот падна под 79.000 долари во неделата ноќта додека инвеститорите се подготвуваа за континуирана нестабилност на глобалните финансиски пазари оваа седмица, откако глобалните берзи го претрпеа најголемиот пад од 2020 година минатата седмица поради американските царини за стоки од остатокот од светот.
Според Coin Metrics, цената на биткоинот падна за четири отсто на 78.835 долари по тргувањето над 80.000 долари во поголемиот дел од оваа година, со исклучок на неколку краткорочни падови под тоа ниво поради минатонеделната нестабилност. Таа цена е околу 34 отсто пониска од рекордното високо ниво на биткоинот постигнато во јануари.
Цената на водечката криптовалута обично се движи како цените на акциите на големите технолошки компании, а трговците често ја сметаат за водечки показател за расположението на пазарот, но минатата седмица се движеше во спротивна насока од берзата – и покрај падот на берзите, цената на биткоинот се задржа стабилно помеѓу 82.000 и 83.000 долари.
Сепак, во неделата ноќта, нервозните инвеститори почнаа да продаваат криптовалути, со кои вообичаено се тргува 24 часа на ден, бидејќи очекуваат нов „масакр“ на берзите во наредните денови, откако реципрочните царини на САД ги зголемија стравувањата од глобална рецесија и ги принудија инвеститорите да бегаат од ризикот.
Американските царини последните два дена од минатата седмица на берзите избришаа 7.460 милијарди долари од пазарната вредност на акциите содржани во индексот S&P Global Broad Market, 5.870 милијарди долари на Волстрит и уште 1.590 милијарди долари на другите големи светски пазари.
Цената на биткоинот падна за 15 отсто од почетокот на годината и сега се очекува да продолжи да се движи во тандем со цените на акциите, бидејќи стравувањата од глобална рецесија ги засенуваат сите други вести дека криптовалутите би можеле да имаат полза оваа година.
