Изградба на градинка во општина Сопиште, реконструкција на пат и санација на улици, се дел од барањата што денеска пред премиерот Никола Груевски ги претставија жителите во општината. Проблемот со водоводот е решен, а во Сопиште ќе се гради и тениско игралиште.
При посетата на Сопиште на средба со жителите Груевски беше информиран за нивните барања и потреби и ги претстави тековните и идните инфратсруктурни проекти на Владата и општината за подобрување на условите за живот и за развој на општината.
За изградба на градинката општината има изработено проект за кој аплицира за грант преку Министерството за финансии. По одобрување на средствата ќе започне изградбата. Планирано е да бидат инвестирани шест милиони денари.
Напролет ќе се реконструира патот кон Сопиште
На барање на граѓаните министерот за транспорт и врски Владо Мисајловски најави дека ќе започне реконструкција на патот за Сопиште со негово проширување онаму каде дозволуваат условите. Реконструкцијата на патот во должина од 12 километри ќе започне напролет.
Исто така, граѓаните ја истакнаа потребата од санација на локалните улици „23“ и „24“ по што градоначалникот вети дека тие ќе бидат обновени откако ќе бидат одобрени средства за што аплицираат за грант од Светската банка. Очекувањата се дека до крајот на годинава или најдоцна на почетокот од идната во пролетниот период ќе започне нивната изградба. На асфалтирањето ќе му претходи поставување канализациска мрежа што ќе се поврзе со генералната канализација што се гради од страна на Владата, на потегот Сопиште – Сончев град.
На средбата на премиерот Груевски со жителите на Сопиште беше најавено дека за 10 дена ќе започне со изградба ново тениско игралиште со што ќе се излезе во пресрет на уште едно барање.
Граѓаните изразија задоволство од решавањето на проблемот со водоводот. Од скопското Јавно претпријатие посочија дека се заменети 1.100 водомери, но и се извршени дополнителни зафати на водоводната мрежа.
Пред премиерот Груевски беа презентирани досегашните активности од градежните зафати на канализациската мрежа која се гради за потребите на Сопиште и Сончев град, а со која е предвидено одведување на отпадните води низ Кисела Вода и Аеродром. За тоа се инвестирани над 300 милиони денари. Проектот треба да заврши наредната година.