Нивото на невработност од 24, 5 проценти во првото тромесечие на годинава кое е историски најниско ниво, согласно последните податоци на Државниот завод за статистика е пропратено со намалување на бројот на невработени лица во сите региони и општини во државата, пишува Курир.
Континуираното намалување на бројот на невработените лица кое во првите три месеци оваа година споредено со истиот период лани изнесува 31 илјада лица, е продолжување на процесот на постојано намалување на невработеноста која од 38% во 2006 година сега падна на 24,5%.
Овој пад на невработеноста се рефлектира со намалување на бројот на невработени лица во сите региони и општини во државата. За тоа говорат и податоците за бројот на невработени лица во дел од поголемите општини во државата во 2006 година споредено со бројот на невработени лица во 2016 година.
| Општина | 2006 година | 2016 година |
| Битола | 20200 | 11708 |
| Велес | 15447 | 7471 |
| Гостивар | 16636 | 9630 |
| Кавадарци | 9186 | 3843 |
| Кочани | 11170 | 5398 |
| Куманово | 30599 | 19118 |
| Охрид | 12393 | 7233 |
| Прилеп | 24402 | 14165 |
| Свети Николе | 5181 | 2806 |
| Град Скопје | 86072 | 44274 |
| Струмица | 20367 | 11234 |
| Тетово | 28857 | 17838 |
| Штип | 8737 | 4403 |
| Неготино | 5056 | 1916 |
Согласно овие податоци евидентно е драстичното намалување на бројот на невработените лица во сите региони во државата кое некаде изнесува и до 50% и кое е од особено значење како за локалниот економски развој на општините така и за семејната егзистенција на десетици илјади семејства.
-Стратешка цел на владата е намалување на невработеноста, а притоа особено внимание водиме на реализација на овие политики на целата територија на нашата земја обезбедувајќи рамномерен регионален пристап и намалување на невработеноста во сите региони. Затоа и проектите коишто ги реализираме, странските инвеститори коишто ги привлекуваме, капиталните инвестиции коишто ги правиме ги распоредуваме во сите региони на нашата држава, на тој начин давајќи шанса и можности за обезбедување на нови работни места за целокупното население. Податоците покажуваат дека имаме намалување на невработеноста во сите македонски градови и села, што навистина е добар податок, а самиот факт дека во мандатот на владата невработеноста е намалена од 38 % на 24,5 %, а најдобар доказ е дека нашите политики и пристапот којшто го применуваме даваат квалитетни резултати, вели владиниот портпарол Александар Ѓорѓиев.
Од Владата велат дека ваквиот пристап на работа во сегментот на понатамошно намалување на невработеноста ќе продолжи и во идниот период во кој се очекува и дополнително зголемување на бројот на работни места во домашните и странските компании во повеќе региони во државата кои во следниот период се очекува да отпочнат со производство или да го зголемуваат бројот на вработените.
