Направени се видливи позитивни придвижувања по формирањето на новата реформска Влада во Македонија, која има силна поддршка од Германија. Тоа е истакнато на средбата на премиерот Зоран Заев со државниот секретар за европски прашања во Министерството за надворешни работи на Република Германија, Михаел Рот, што се одржа попладнево во македонската Влада.
– Високиот дипломат од Германија, Рот му честиташе на премиерот Заев за неговото назначување за претседател на Владата на Република Македонија. Германскиот државен секретар Рот дојде со силна поддршка од Германија за чекорите на премиерот Заев и на новата Влада на Македонија, во првиот месец од формирањето. Се оценува дека се направени видливи позитивни придвижувања што најавуваат резултати во евроинтеграциските процеси, а во премиерот Заев се гледа како на лидер кој може да ги понесе позитивните промени за Република Македонија и за нејзините граѓани, наведува во соопштение по средбата владината служба за информирање.
Државниот секретар Рот, како што стои во соопштението, посебно ги поздравил интеграцијата на граѓанскиот сектор во реформските процеси, како и политиките на добрососедство што ги манифестира новата Влада.
– Владата на Република Македонија е определена кон инклузивни политики на отвореност кон целата општествена јавност којашто сака и може да помогне во реализацијата на реформската агенда, вклучително и на опозицијата. Исто така, цврсто сме насочени кон градење мостови на соработка со нашите соседи и со пријателите од меѓународната заедница, коишто даваат значајна поддршка на Македонија во демократските процеси, рекол премиерот Заев.
Се заблагодарил на државниот секретар Рот за големата принципиелна и пријателска помош на Македонија од Република Германија во процесот на надминувањето на политичката криза, како и во остварувањето на стратешките цели на државата, интеграциите во ЕУ и во НАТО. Германскиот дипломат Рот, пак, најавил дека Германија ќе продолжи да поддржува Македонија во реформскиот процес што треба да обезбеди владеење на правото, слобода на говор и да ја осигура демократијата во државата како важни европски вредности.