Првичните резултати по само две недели од стапување во сила на Законот со кој компаниите се ослободени од трошоци доколку вработат млади лица до 29 години се многу позитивни, истакна денеска портпаролот на Владата, Александар Ѓорѓиев во гостувањето во Дневникот на МРТ.
„Бизис заедницата со големо одобрување гледа на оваа мерка и ја искористува во еден добар значаен дел. Со самото законско решение се предвидува помош за самите компании, затоа што некаде околу 37 отсто од трошоците кои тие регуларно би ги имале за ангажирање на кадар за вработување на луѓе остануваат кај нив, односно државата ги ослободува од околу 37 отсто од трошоците кои се наменети за персонален данок или пак за придонеси кои се наменети за тие вработувања“, истакна Ѓорѓиев.
Владиниот портпарол нагласи дека она што е позитивно е тоа дека во рок од две недели од стапување на законот во сила, до Агенцијата за вработување се поднесени над 600 барања за вработување на лица.
„Тоа се 600 нови вработувања кои се реализираат и ќе се реализираат во текот на следниот период и кога ќе го земеме периодот во кој законот важи, тоа е една извонредно добра динамика која очекуваме да продолжи и понатаму, а компаниите се’ повеќе да ја користат, но и да се прошири бројот на сами компании кои ќе се заинтересираат за користење на овие бенефити“, посочи Ѓорѓиев.
Тој додаде дека овие мерки значат и бенефит за граѓаните, нови вработувања кои ќе значат егзистенција за младите и обезбедување на опции за понатамошен кариерен развој.
