Во сабота, 21 октомври на Технички факултет во Битола, ќе се одржи првата Регионална конференција на „Студенти за слобода“ во Македонија. Студентите и заинтересираните граѓани ќе имаат можност да слушнат предавања и дискусии кои ја промовираат индивидуалната слобода.
Главен говорник на конференцијата е извршниот директор и виш истражувач на Страјкер Пирс, Брајан О’Шеа, кој во Битола ќе зборува на тема „Разоткривање на шпионажата“.
Во своето предавање О’Шеа ќе говори за тоа како може да се препознае разузнавањето и како да се заштитиме тоа.
Брајан има повеќе од 20 години искуство во областа на истраги и разузнавање, работејќи како воен разузнавач за две специјални единици и две државни агенции.
За политичките аспекти на слободата, на конференцијата ќе зборуваат деканот на Правниот факултет при УКЛО, Горан Илиќ и професорот на Правниот факултет „Јустинијан Први“, Ненад Марковиќ. А освен тоа посетителите на конференцијата ќе имаат можност да слушнат предавање и за медиумите и слободното фриленс новинарство од Бил Вирц, фриленс новинар од Брисел и Љубица А. Манговска, новинарка и програмски менаџер на Тера ТВ.
Адвокатот Јанаки Митровски и програмскиот директор на Европски студенти за слобода, Александар Кокотовиќ, двајцата активисти за легализација на канабисот, ќе одржат предавање на таа тема, на коешто ќе ги претстават потребните реформи во насока на легализација на канабисот и слободарскиот активизам којшто го попратува движењето.
Студенти за слобода – Македонија е независна и неформална студентска група, која што е дел од Европски студенти за слобода, односно европскиот чаптер на организацијата Студенти за слобода (Students for Liberty) со седиште во Вашингтон. Студентската група има за цел промоција на индивидуалните економски и политички слободи, а во нејзиното досие досега има забележано превод на три книги: „Зошто слобода“, „Мир, љубов и слобода“ и „Моралноста на капитализмот“, како и два Лидерски форуми и неколку предавања и дискусии.
