Мекларен ги обвини Ферари и Светската автомобилистичка федерација (ФИА) дека го
прекршиле џентлменскиот договор кога италијанскиот тим реши да го ангажира
директорот за безбедност на ФИА, Лорен Мекис.
Мекис даде три месеци рок пред да си замине од позицијата заменик директор на трки, и
ќе почне да работи во Ферари на 20 септември.
Неговото потпишување доаѓа откако Рено го ангажираа поранешниот технички шеф на
ФИА, Марсин Будковски на крајот на минатата сезона, по што тимовите се согласија дека
мора да има минимум 12 месеци пауза помеѓу заминување од ФИА и ангажирање од некој
од тимовите.
-Многу сме незадоволни од ФИА поради тоа што загубија уште еден клучен вработен од
страна на тркачки тим. Посебно откако беше договорено од сите тимови на последниот
состанок на „Стратешката група“ дека клучните технички луѓе од ФИА не смеат да бидат
ангажирани од Ф1 тимови барем 12 месеци по заминување од ФИА. Ферари одат против
џентлменскиот договор, а на ФИА не им е грижа- вели шефот на Мекларен, Ерик Булие
за „Аутост“.
Претходно претседателот на ФИА, Жан Тод рече дека Ферари треба да го изгубат правото да наметнуваат вето кога не сакаат да прифатат некој предлог за промена предложен од раководството на Формула 1. „Скудерија“ има право да ги сопре иновациите во Правилникот, кои не им се допаѓаат, а последниот таков случај беше во 2015 година кога Италијанците одбија да се согласат со финансиска граница за мотори и менувачи.
За да се искористи ветото, Ферари мора да докаже дека одредена промена ќе биде против
интересите на тимот. Сепак, претседателот на ФИА е свесен каква атракција за љубителите на Формула 1 е Ферари и нуди замена – со укинувањето на ветото, италијанскиот тим да добива повисоки приходи
поради историјата во шампионатот.