На седницата во петокот Советот на Народната банка на Република Македонија донесе одлука од 15-ти мај годинава да бидат пуштени во оптек книжни пари изработени од полимер, во апоени од 10 и 50 денари, со коишто ќе бидат заменети банкнотите во истите апоени кои беа во оптек од 8-ми септември 1996 година, објави централната банка.
„Согласно со оваа Одлука, на денот кога ќе бидат пуштени во оптек книжните пари во апоени од 10 и 50 денари, изработени од полимер, книжните пари со истата апоенска вредност, коишто се во оптек од септември 1996 година престануваат да бидат законско средство за плаќање. Нив, правните и физичките лица ќе можат бесплатно да ги заменат со други книжни и ковани пари со еквивалентен износ. Замената на книжните пари, од 15-ти мај годинава до 15-ти мај следната година, ќе ја вршат деловните банки основани во Република Македонија, а по овој период, замената ќе се врши во Народната банка“, се наведува во соопштението.
Народна банка на Електронскиот систем за јавни набавки кон средината на јуни минатата година објави оглас за печатење на апоените и за тоа ќе плати 127 милиони денари без ДДВ или околу два милиона евра. Критериум за добивање на договорот беше најнискара цена. Станува збoр за печатење на 25 милиони парчиња во апоени од 10 денари и 15 милиони парчиња апоени од 50 денари. Вкупната вредност на новите апоени кои ќе бидат пуштени во оптек е милијарда денари.
Новите пари ќе бидат изработени од специјален полимер. Боите ќе бидат постојани на светлина и отпорни на влажност и други екстремни климатски услови, како и на хемикалии. Кај 10-денарката, во транспарентниот прозорец ќе биде прикажан фин стилизиран цртеж на паун, а вградена обоена слика ќе се влева во прозорецот со дел од детали од пердувите на опашката на паунот. Кај апоенот од 50 денари, во транспарентниот прозорец ќе биде прикажан фин стилизиран цртеж на рановизантиска монета, а вградена обоена слика ќе се влева во прозорецот со кругови коишто зрачат околу монетата.
Советот на седницата донесе Одлука од 15-ти април годинава да бидат пуштени во оптек ковани пари во апоен од два денари, со ознака на ковање „2018“.
„Со пуштање во оптек на овие ковани пари во готовинскиот платен промет на Република Македонија, во важност ќе бидат, паралелно, и кованите пари во апоен од два денари издадени претходно. На седницата беше донесена и Одлука согласно со која од 2-ри мај годинава ќе бидат пуштени во оптек и книжни пари во апоен од 100 денари, со ознака за печатење ‘МАЈ 2018’, по што во важност ќе бидат, паралелно, и книжните пари со истата апоенска вредност издадени досега“, се додава во соопштението од НБРМ.
Советот на НБРМ донесе Одлука за начинот на вршење супервизија и надзор, со која се овозможува натамошно унапредување на начинот на кој НБРМ врши супервизија на деловните банки во Републиката и надзор на работењето на лица поврзани со деловна банка, на други лица во банкарска група и на друштво за помошни банкарски услуги.
Со Одлуката се врши приближување на супервизорската практика на Народната банка до практиката којашто се применува од страна на Европската централна банка и од страна на националните супервизорски органи од Европската Унија коишто се членки на единствениот супервизорски механизам.