Администрацијата на претседателот на САД, Доналд Трамп вчера предложи ублажување на федералните стандарди за ефикасност на потрошувачката на горивото од ерата на претседателот Барак Обама, а кои треба да стапат во сила во 2020 година.
Предлогот ќе ги суспендира напорите за подобрување на енергетската ефикасност на автомобилите и намалувањето на издувните гасови кои влијаат врз климатските промени, објави АП.
Администрацијата на Трамп, исто така, сака да ги укине овластувањата на Калифорнија и на другите држави да донесуваат сопствени, построги стандарди за ефикасноста на потрошувачката на горивото, независно од федералната влада.
Меѓутоа, државните обвинители од 19 американски сојузни држави и од федералната област на Вашингтон најавија поднесување на тужба против администрацијата на Трамп поради планираното олабавување на федералните ограничувања за ослободување на штетни издувни гасови од автомобили и камиони.
Подготвени сме да одиме на суд за да се спречи овој беобзирен и незаконски план, се вели во соопштението на коалицијата државни обвинители предводени од државниот обвинител на Масачусетс, Маура Хили.
