Од својата резиденција во Скопје бискупот Киро Стојанов на во понеделникот го благослови почетокот на работата на веб страницата Ватикан њуз на македонски јазик и со тоа е 35 јазик на кој овој глобален портал објавува вести од Ватикан, црквата и светот.
„Радосен сум како бискуп – ординариј во Македонија, на сите верници католици и од источен и од западен обред, што токму на празникот Собор на свeти архангел Гаврил (според јулијанскиот календар) можам да ги поздравам сите луѓе со добра волја што од денес и на овој многу современ начин преку веб страницата на Ватикан њуз ќе можат да ги следат активностите на Папата, Ватикан и нашата помесна црква во Македонија. Повод на оваа добра волја на уредникот на Ватикан њуз е секако најголемиот настан во нашата најнова историја, а тоа е Апостолската посета на Светиот отец папата Фрањо што ќе биде на 7-ми мај оваа година“, изјави по тој повод Скопскиот бискуп и Струмичко-скопскиот епарх монсињор Стојанов.
Стојанов, исто така упатува благодарност затоа што на овој начин се отвора „нов прозорец“ да се погледне животот на една мала црковна заедница која е во единство со сеопштата Мајка црква и што сака да ја пренесува Радосната вест на Божјото слово кое трајно се овоплотува во нашиот живот и ја храни нашата вера.
„Покрај Марија од Назарет, сакаме и со ова средство на современата комуникација – да бидеме отворени кон Радосната вест што ја навестува архангел Гаврил. Сакаме покрај Марија која е отворена кон Овоплотувањето и ние да бидеме отворени кон Таинственото Тело Христово – Црквата и така на тој начин да го направиме видливо единството и служењето на навестувањето на Вистината што се случува на местото „каде што Петар претседава во љубов“ со сите Цркви“, се додава во поздравната изјава на монсињор
„Нека е благословен овој почеток, поткрепен во мојата скромна молитва до Господа Бога биде во служба на Универзалната Црква, што е создадена од повеќе членови, од што еден од тие членови од денес ќе биде и нашата Католичка заедница во Македонија. Нека светлината на оваа веб страна биде секогаш „Светлина Христова“ за сите оние кои се наоѓаат по светот или го познаваат македонскиот јазик и народ. Сите заедно да молиме, Апостолската посета на папа Фрањо да вроди големи духовни плодови!“, заклучува Стојанов.
Ватикан њуз се изразува и комуницира повеќејазично, мултикултурално, повеќеканално, мултимедијално и мултиуредничко ниво. Има четири тематските области кои информираат за активностите на Папата, Светиот Престол, месните Цркви, давајќи простор и на вестите од светот. Една „супер редакција“, на 35 јазици и чија цел е не само да информира, туку и да понуди клуч за интерпретација во светлината на Евангелието.