Половина од корисниците на интернет во Европската унија својот одмор или патување го резервирале онлајн. Најчесто тоа го направиле корисниците од Луксембург – 73 проценти, а најмалку Бугарите – 17 и Романците 18 отсто. Онлајн одмор резрвирале само 13 проценти од корисниците на интернет во земјава.
Според податоците на Евростат, во 2017 година, по Луксембург својот одмор или патување преку интернет најчесто го резервирале корисниците во Финска со 65, Германија со 64 и Данска со 60 проценти.
Онлајн планирањето на одморот или патувањето е најмало меѓу помладите корисници на интернет на возраст меѓу 16 и 24 години (41%) и постарите корисници на возраст меѓу 65 и 74 години (47%). Интернет резервациите се најпопуларни меѓу корисниците на интернет на возраст меѓу 25 и 34 години, од кои 55 проценти одговориле дека својот одмор или патување го резервирале онлајн.
Во нашата земја само 13 проценти од корисниците на интернет одговориле дека го резервирале својот одмори или патување онлајн. Најчесто својот одмор онлајн го резервираат луѓето на возраст меѓу 25 и 34 години (16%), а нешто помалку (12%) луѓето на возраст меѓу 16 и 24 години и најмалку, само шест проценти луѓето на возраст меѓу 65 и 74 години.
По Македонија, следуваат корисниците на интернет од Турција – 15%, Бугарија – 17% и Романија – 18 %.
Во регионот најчесто својот одмор го резервирале онлајн корисниците на интернет од Словенија – 49%, по што следат Грција – 40%, Србија – 35% и Хрватска – 25%.