Албанскиот премиер Еди Рама не очекува Албанија следната седмица да добие датум за почеток на преговорите за пристапување во Европската унија.
Рама изјави дека не е оптимист во врска со започнувањето на преговорите на Албанија и Северна Македонија со ЕУ, за што Европскиот совет треба да одлучи следната недела.
„Дали сум оптимист? Не“, изјавил Рама за весникот The Irish Times, а пренесе агенцијата Танјуг.
Рама додава дека не може да биде оптимист доколку реално се согледаат случувањата во ЕУ.
„Јас сум оптимист за иднината на земјава, но не и за тоа што ќе се случи следната недела. Ние сме колатерална штета. Тоа е како кога паѓаат бомби и ќе погодат градина. Ние сме таа градина“, изјавил Рама.
Тој додава дека неговата земја не очекувала да стане членка на ЕУ следната недела и знае дека тоа не е можно, туку да бара почеток на преговорите кои би помогнале Албанија да стане членка во следните десетина години.
