На Фејсбук страницата „Против загадување и труење на народот“ беше објавена фотографија од голем чад кој се појавува од запалени контејнери во скопската општина Ѓорче Петров.
Од ЈП Комунална хигиена ја потврдија информацијата и информираа дека два новопоставени контејнера со зафатнина од 3,2 м3, биле опожарени синоќа на главната улица во населбата Ѓорче Петров.
Во истиот период се запалени и шест пластични контејнери од 1,1м3 во населбата Ново Лисиче. ЈП „Комунална хигиена“-Скопје и за време на изминатиот викенд се соочи со ваков инцидент во скопската населба Радишани, каде што изгореа три контејнери од 1,1 м3 и еден специјален контејнер-ѕвоно, наменет за селекција на стакло.
„Опожарените садови се целосно уништени и неупотребливи. Веќе имавме случај на еден опожарен нов контејнер на улицата Рузвелтова, а во текот на минатата ноќ изгореа уште два нови и шест од старите садови за одлагање на отпадот. Покрај значителната финансиска штета што е нанесена на ЈП „Комунална хигиена“-Скопје, овие инциденти предизвикуваат големи проблеми при одлагањето, собирањето и транспортот на комуналниот отпад. Апелираме да престане вандализмот и уништувањето на контејнерите, за екипите на Претпријатието да можат навремено да ги извршуваат своите работни обврски на терен“, изјави директорот на ЈП „Комунална хигиена“, Абдусамед Шабани.