Претседателите на Русија, Казахстан и на Белорусија – Владимир Путин, Нурсултан Назарбаев и Александар Лукашенко – во главниот град на Казахстан, Астана, потпишаа историски договор за основање Евроазиска економска унија. ЕАЕУ ќе почне да функционира на 1 јануари 2015 година, пишува „Руска реч“.
Според изјавите на Владимир Путин, овој документ значи принципиелно ново ниво на интеграција на земјите-членки.
„Во целосна мера се задржува државниот суверенитет, ние обезбедуваме потесна и поускладена економска соработка“, изјавил Путин.
Според раководителот на лабораторијата за меѓународна трговија при Институтот за економска политика „Гајдар“ Александар Кнобељ, спогодбата на ЕАЕУ не носи ништо ново од економска гледна точка.
„ Сè што е забележено во документот веќе е пропишано во рамките на другите сојузи на кои им припаѓаат трите земји. Затоа, благодарение на создавањето на Унијата во кус временски период нема да дојде до значителен обем на трговијата меѓу нив. Уште повеќе што трговијата меѓу членките на Унијата уште од 1992 година е ослободена од плаќање царина“, вели Кнобељ.
Но, во четвртиот сегмент на спогодбата новата унија создава основа за изнаоѓање понатамошни компромиси и за укинување на останатите ограничувања. Трите држави врз себе преземаат одговорност да гарантираат слободно движење на стоката, услугите, капиталот и на работната сила во самата Унија. Членките на Унијата ќе спроведуваат усогласена политика за клучните гранки на стопанството: енергетиката, индустријата, земјоделството и сообраќајот.
За 11 години трите страни би требало да формираат единствен пазар на нафта и гас. До 2019 година Русија, Казахстан и Белорусија имаат намера да создадат заеднички електроенергетски пазар. Брз напредок е планиран и на полето на создавање заеднички пазар за фармацевтски и медицински средства – рокот во оваа област е 1 јануари 2016 година.
