Министерот за здравство Венко Филипче на ја исклучува можноста хоспитализираните заболени од Ковид-19 да плаќаат партиципација за болничкото лекување.
„Со одлука на Влада ги покриваме трошоците за сите кои не се здравствено осигурани, но можно е да земеме во предвид и плаќање на партиципација. Ќе направиме финансиска конструкција. Тоа може за неколку дена да биде завршено“, рече Филипче во одговор на прашање на вчерашнат прес-конференција.
За соопштението испратено од директор на една клиника до вработените во кое им порачува дека излегување во медиуми е дозволено само со писмена согласност од директор и оти ќе биде санкционирано секое излегување во медиумите кое ѝ штети на угледот на клиниката и ја разнишува довербата на вработените во услови на криза и влева недоверба во постапувањето на епидемиолошките служби и институциите на системот, Филипче рече дека ќе го провери и ќе информира што е причината за ваквата комуникација со вработените.
„Разговарав со директорката непосредно пред започнувањето на прес-конференцијата и ја замолив да ми ги прати сите мејлови и комуникација. Лично не се согласувам со ограничување на информациите. Стојам зад тоа отворено, транспарентно и точно да информираме во било кој момент и дека не поддржувам какво било ограничување на каква било комуникација. Ќе разговарам, па ќе информирам што е причината или позадината на ваквата комуникација“, потенцираше Филипче.
