Сите оружени сили на територијата на Грција од средата ноќта се во состојба на полна борбена готовност, единиците се итно пополнети, а флотила на воената морнарица е распоредена во Егејското Море кај клучни делови на грчката поморска територија, каде Турција го најави истражувањето за наоѓалишта на природен гас и нафта.
Воената морнарица на Грција издаде итно известување со кое ја поништи идентичната турска најава за испраќање на истражувачкиот брод во грчката зона на експлоатација на морето, објавија грчките медиуми. Сличен потег направи и Кипар, за деловите од Средоземјето кои му припаѓаат, а каде Турција исто така најави сеизмичко истражување на морското дно.
Известувањата на грчката воена морнарица ги повикуваат екипажите на сите бродови да го „игнорираат нелегалното турско известување“ бидејќи „го објавила неовластена (турска) станица и се однесува на нелегални активности во грчкиот регион“.
Грција укажа дека само нејзината поморска база која ја користат и САД и НАТО, во Ираклион, на Крит, има овластување да објавува „навтекс“ за областите на кои претендира Турција.
Турција возврати реципрочно: дека новите грчки и кипарски „навтекси“ ги објавиле станици кои се „неовластени за одредениот регион“ каде Турција сака да трага по гас и нафта.
Грчките медиуми јавуваат дека турскиот истражувачки брод Орук реис и понатаму е вкотвен во турското средоземно пристаниште Анталија, веројатно поради силниот ветер, додека е регистрирана интензивна активност на турски воени бродови кај поморската база Аксаз, на југот на Егејот, во близина на градот Мармарис.
