Министерот за здравство Венко Филипче во објава на својот фејсбук профил тврди дека процентот на хоспитализирани лица заболени од Covid-19 во изминативе две недели е намален за речиси два процентни поена.
„Во изминативе две недели, и покрај благиот раст на активни случаи со ковид-19, процентот на хоспитализирани бележи пад од речиси 2, односно од 11,5 на 15 јули на 9,7 отсто на 23 јули“, напиша Филипче.
Според министерот за здравство, за време на целата епидемија, највисокиот процент на болни кои завршиле во болница е 12 лица на секои 100 заразени.
„Во континуитет, процентот на хоспитализирани од вкупниот број на активни случаи не надминува повеќе од 12 отсто. Да ги почитуваме мерките, да се заштитиме себеси, здравствените работници и да го одржиме нашиот здравствен систем стабилен!“, напиша Филипче.
