Славниот моден дизајнер Пјер Карден почина на 99-годишна возраст во вторникот утрото во американската болница во предградие на Париз, соопшти неговото семејство за агенцијата AFP.
Пјер Карден е роден на 2-ри јули 1922 година како Пјетро Кардини во земјоделско семејство во италијанската општина Сан Бјаџо ди Калалта, во регионот на Венеција.
Кариерата ја започнал ако кројач и театарски уметник. Во доцните 40-ти години од минатиот век работел во ателјето на славниот Кристијан Диор, за неколку години подоцна да создаде сопствена модна куќа, а подоцна и бутик за мебел во Париз. Заедно со Андре Куреж и Пако Рабан, Карден учествува во заживувањето на високата мода во повоена Франција.
Дизајнирал и патентирал повеќе од 500 модни додатоци и решенија, меѓу кои се разнобојните чорапи, високите чизми, мини-сарафани и „цветни“ вратоврски. На пример своевремено членовите на некогаш ултра-славната британска група The Beatles настапувале во палта без крагни од Карден. Во светот на мода е запаметен и по дизајнирањето на костимите и вечерните тоалети за славната руска балерина Маја Плисецкаја, којашто ја сметал за своја муза.
Во Франција модниот дизајнер основа свој музеј, кој се наоѓа во Сен-Оан близу Париз, каде што се изложени неговите најоригинални дела. Како што велеше самиот Карден: „Талентот и вкусот не се доволни, стилот одлучува за сѐ“. Неговата модна куќа затоа ја нарекуваат и „креативна лабораторија“.
