Владата на Зоран Заев нема апсолутно никаква стратегија за излез од економската криза. Мерките кои ги преземаат се обично замајување на јавноста и купување на ден повеќе социјален мир во Македонија, велат од ВМРО-ДПМНЕ.
Од партијата посочуваат дека Македонија со 3,5 oтсто е трета земја во Европа која одвоила најмалку средства за поддршка на стопанството изразено во проценти од бруто домашнот производ (БДП).
„Ама затоа гледаме дека милионски средства одвојуваат општините за партиски вработувања на локално ниво. Затоа стопанството тоне, а над 55 илјади лица се нови невработени. Дури и тие средства кои владата се фали дека ги одвоила во пакет мерките, катастрофално лошо се реализираат. Па така наместо помпезно најавуваните над 1,2 милијарди евра помош, во економијата завршиле помалку од 350 милиони. Тоа јасно покажува дека ниту мерките се обмислени, ниту даваат резултат. Заради тоа во минатата година згаснаа 6.200 компании, а најмалку уште двојно едвај преживуваат“, посочуваат од партијата.
Од ВМРО-ДПМНЕ предупредуваат дека покрај згаснувањето на компаниите и губењето на работните места, расте задолженоста на земјата што го поставува прашањето каде завршуваат тие средства кога стопанствениците се жалат на недоволната помош од државата во кризата а истовремено отстуствуваат и вложувањата во капитални проекти.
„Во услови кога државата не дава ефективна помош, во услови кога десетици илјади семејства остануваат без егзистенција, во услови кога илјадници компании згаснуваат, во услови кога нема капитални инвестиции, логично се поставува прашањето каде завршија над милијарда нов долг што го генерираше Владата на Заев за мината година, со што го надмина психолошкиот праг на долгот над 60 отсто од БДП. Ниту може да се вадат на ковид-кризата, ниту на глобалните економски текови, бидејќи гледаме дека соседните земји во исти услови имаат далеку подобри резултати. На дното сме во регионот, а да не говориме за Европа, според нивото на странски директни инвестиции. Во споредба со Србија, Бугарија и Албанија имаме од 2 до 4 ипол пати помалку инвестиции по глава на жител, што говори дека не само во здравствен аспект, туку и во економски аспект сме црна дупка во Европа. Тоа е резултат на неспособноста и корумпираноста на оваа власт, која ја јаде економијата и го осиромашува народот, додека самата се богати“, се наведува во соопштението на ВМРО-ДПМНЕ.
